Yfirvegun

Eitthvað segir mér að Hollendingar höndli þetta mál af mun meiri yfirvegun og festu heldur en Bretar.
Ímyndið ykkur ef breski forsætisráðherrann hefði haldið ró sinni og metið stöðuna á svipaðan hátt, gert sambærilega yfirlýsingu, þá hefði þetta örugglega aldrei orðið mál og innistæður hefðu haldið.

Það þarf að kortleggja atburðarásina, það sem var sagt og stefna síðan Breska ríkinu fyrir hrun Kaupþings vegna lyga og rangfærslna forsætisráðherra síns sem áttu sér ítrekað stað. Þetta er orðið að ofsókn Breta gegn Íslendingum.

Hollensk stjórnvöld tryggja hag Icesave reikningshafa

Athugasemdir

[Árni Viðar Björgvinsson, 10.10.2008 kl. 00:01]

Þetta er algjörlega orð á móti orði, og því er spurning hvort við komum nokkurntíma til með að vita sannleikann. Hins vegar verður seint hægt að kenna Bretum um þetta ástand á Íslandi í dag. Ef Bretar áttu hrákann sem fyllti balann og velti hlassinu, er það eingöngu vegna þess að Íslendingar voru búnir að ausa í balann í marga mánuði.

[A.L.F, 10.10.2008 kl. 00:04]

Ég er sammála, ef í ljós kemur að hægt sé að rekja endanlegt hrun til aðgerða breta eiga þeir að blæða fyrir það, ekki finnst þeim lítið mál að láta okkur blæða. 

[Þorvarður Goði, 10.10.2008 kl. 07:10]

Sveinn Elías: Nei, ég er ekki viss og óttast hið versta. Eins og Árni Viðar segir, þá er þetta orð á móti orði. Það þorir enginn að svara fyrir Ísland af því að við erum föst í hringiðu fjölmiðlafárs og enginn veit hvað slíkt viðtal gæti dregið á eftir sér eins og komið er. Enskukunnátta er greinilega misgóð meðal ráðamanna og auðvelt að misskilja sé hlustandinn þannig gíraður.

Bretar geta ekki bakkað með þessar ásakanir, þar sem það væri viðurkenning ábyrgðar á þessu offorsi, og þeir þar með skaðabótaskyldir.

Ísland situr því í súpunni þar til Brown rennur reiðin, eða einhver annar tekur við stjórntaumum. Brown þarf að tefla sjálfum sér fram sem dugandi stjórnmálamanni, sem allir vita að hann er ekki, og þetta er greinilega nógu viðráðanlegt fyrir hann. Við spiluðum okkur upp í hendurnar á honum.

[Árni Viðar Björgvinsson, 10.10.2008 kl. 11:13]

Þetta er náttúrulega einföld leið fyrr Breta til að ýta umræðunni frá eigin vandamálum, og leyfa fréttunum að tala um ekkert nema þessa "rudda" á Íslandi. Ég veit persónulega ekki hverjum ég á að trúa, því ég á MJÖG auðvelt með að trúa þeim báðum til þessarar vitleysu. GB trúi ég til þess að ljúga þessu viljandi, og okkar mönnum trúi ég til þess að segja þetta án nokkurrar hugsunnar.